Казанның җәмәгать транспорты бер елга 226 млн пассажир ташыган

Ел нәтиҗәләре буенча Казанның җәмәгать транспорты 226,3 млн пассажир ташыган. Бу 2023 ел нәтиҗәләре буенча 2% ка кимрәк. Узган ел 231,3 млн кеше күчерелгән булган. Күрсәткеч шәхси ташучыларның банкротлыгы, шулай ук машина йөртүчеләр һәм кондукторлар җитмәү аркасында кимегән (712 хезмәткәр). Мондый мәгълүматларны Казан мэры Илсур Метшинның йомгаклау хисабында транспорт комитеты рәисе Алексей Сидоров китерде.

2024 елда казанлылар барыннан да ешрак автобуслардан файдаланган, алар 145,7 млн яки 64% пассажир ташыган. Метро популярлыгы буенча икенче урында, аның хезмәтләреннән 39 млн кеше файдаланган (18%). Тагын 25 млн пассажирны (11%) троллейбуслар һәм 16 млн (7%) – трамвайлар ташыган. Шулай итеп, Казанның җәмәгать транспортыннан көн саен уртача 620 мең пассажир файдалана.

Метрополитеннан узган ел белән чагыштырганда 4,1 млнга күбрәк пассажир файдаланган. Трамвай һәм троллейбуслардагы күрсәткечләр узган ел дәрәҗәсендә калган. Автобусларда йөрүчеләр саны 9 млн пассажирга кимегән.

Автобуста ташуның кимү сәбәбе – кадрлар кытлыгы: бүгенге көндә тармак предприятиеләренә 325 машина йөртүче (планлы саннан 21% кытлык) һәм 387 кондуктор (35% кытлык) кирәк. Шулай ук узган ел дүрт шәхси компаниянең ташу базарыннан китүе дә бер сәбәп булып тора. Барлыгы соңгы биш елда банкротлык аркасында автобус ташу базарыннан сигез компания китте. Аларның барлык маршрутлары «2 нче номерлы ПАТП» хезмәт күрсәтүгә тапшырылган.

Шулай ук узган ел ташламалы категориягә караган 71,8 млн пассажир ташылган. Исегезгә төшерәбез, хәзер Татарстан республикасы ташлама алучының һәр юл йөрүе өчен 33 сумга кадәр түли, ә билет бәясе 43 сум. Шулай итеп, билет бәясеннән 10 сум компенсацияләнмәгән булып кала.

Кризиска каршы чара сыйфатында комитет ун автобус хәрәкәте схемасына үзгәрешләр кертергә мәҗбүр булды. Ике автобус маршруты гамәлдән чыгарылды. Хәрәкәт составының чыгуы 63 берәмлеккә кимегән.

Бүген шәһәрнең транспорт челтәренә җиде ташучы хезмәт күрсәтә – ике муниципаль унитар предприятие («Метроэлектротранс» МУП һәм «2 нче номерлы ПАТП» МУП) һәм биш шәхси ташучы.

Алексей Сидоров искәрткәнчә, узган ел шәһәр 127 яңа автобус (агымдагы елда тагын 30 көтелә) һәм МАЗ соңгы буынының 39 троллейбусын сатып алган. 2018 елда Футбол буенча дөнья чемпионатына күчмә состав масштаблы рәвештә яңартылды (242 автобус, 20 трамвай). Бүген Казанның күчмә җәмәгать транспорты составы Россиядә иң яшьләрдән санала. Шәһәрнең автобус паркының уртача елы 5,9 ел тәшкил итә (тулаем ил буенча – 14,6); троллейбуслар - 7,8 (РФ буенча якынча 15 ел); трамвайлар - 7,5 (РФ буенча якынча 25 ел).

Исегезгә төшерәбез, бүгенге көндә шәһәрнең транспорт челтәре 54 автобус маршрутын үз эченә ала, аларда 608 берәмлек транспорт; 10 троллейбус маршрутында 136 берәмлек; 9 трамвай маршрутында 87 берәмлек транспорт; 15 составта (51 вагон) 11 станцияле бер метрополитен линиясе файдаланыла.